ADDRESS TO A HAGGIS


 Fair fa' your honest, sonsie face,
Great chieftain o' the puddin'-race !
Aboon them a' ye tak your place,
              Painch, tripe, or thairm :
Weel are ye wordy o' a grace
              As lang's my arm.

The groaning trencher there ye fill,
Your hurdies like a distant hill,
Your pin wad help to mend a mill
              In time o' need,
While thro' your pores the dews distil
              Like amber bead.

His knife see rustic Labour dight,
An' cut you up wi' ready sleight,
Trenching your gushing entrails bright,
              Like ony ditch;
And then, O what a glorious sight,
              Warm-reekin', rich !

Then, horn for horn, they stretch an' strive:
Deil tak the hindmost ! on they drive,
Till a' their weel-swall'd kytes belyve
              Are bent like drums;
Then auld Guidman, maist like to rive,
             'Bethanket!' hums.

Is there that owre his French ragout
Or olio that wad staw a sow,
Or fricassee wad mak her spew
               Wi' perfect sconner,
Looks down wi' sneering, scornfu' view
               On sic a dinner ?

Poor devil! see him owre his trash,
As feckless as a wither'd rash,
His spindle shank, a guid whip-lash,
               His nieve a nit;
Thro' bloody flood or field to dash,
               O how unfit!

But mark the Rustic, haggis fed,
The trembling earth resounds his tread,
Clap in his walie nieve a blade,
               He'll mak it whissle;
An' legs an' arms, an' heads will sned,
               Like taps o' thrissle.

Ye Pow'rs wha mak mankind your care,
And dish them out their bill o' fare,
Auld Scotland wants nae skinking ware
               That jaups in luggies;
But, if ye wish her gratefu' prayer,
               Gie her a Haggis!

Robert Burns



Taken from "The Poetical works of Robert Burns" (London & Glasgow Collins' Clear-Type Press)
with the inscription "This Volume is Dedicated by kind permission to the
Greenock Burns Club (instituted 1802) The oldest Burns club in existence."


Sponsored by Totally Herby, makers of herbal Itch Ease for Midges,
the famous Clootie Dumplings,
and other fine Scottish products from Ayrshire - Burns own County.

© Copyright 1999-2017  Elmbronze Ltd